مسوولان معارف حکومت سرپرست در ولایت هرات با صدور مکتوبی، تجلیل از «روز معلم» در مکتب‌های دولتی و خصوصی این ولایت را ممنوع کرده‌اند.
مکتوبی که امروز (شنبه، ۱۲ میزان) توسط آمریت عمومی معارف شهر هرات نشر شده، آمده است: «به تمام مکاتب دولتی و خصوصی مربوط آمریت معارف شهر هرات هدایت داده می‌شود که به‌نام روز معلم هیچ‌گونه تجلیل در مکاتب گرفته نمی‌شود.»
همچنین آمریت معارف شهر هرات در این مکتوب هشدار داده است: «جمع‌آوری پول از نزد دانش‌آموزان و آموزگاران تحت هرنام ممنوع می‌باشد و در صورت مشاهده مسئولیت به دوش آمران و مسوولان مکاتب می‌باشد.»
این مکتوب یک روز پیش از «روز جهانی معلم» صادر شده است.
پیش از تسلط دوباره‌ی حکومت سرپرست از این روز در مکاتب دولتی و خصوصی در افغانستان تجلیل می‌شد، اما دولت اکنون مانع تجلیل آن می‌شود.
روز جهانی معلم یک رویداد سالانه است که در پنجم اکتبر، برگزار می‌شود. این روز توسط یونسکو نامگذاری شده است.
